हरियाणा के बारै मै

हरियाणा उतर भारत का एक राज्य सै, जिसकी राजधानी चंडीगढ़ सै जो केन्द्र शाषित प्रदेश होण कै गेल-गेल पंजाब की भी राजधानी सै| इसतै पहल्या यो पूर्वी पंजाब का भाग था , 1 नवम्बर 1966 म्ह इसनै भारत के 17 वे राज्य के रूप म्ह एक न्यारी पिच्छाण मिली| इसका पुराणा नाम बहुधान्य था| इस राज्य म्ह सारया तै बोली जाण आळी भाषा हरियाणवी सै| क्यूँके 70 प्रतिशत हरियाणा गाँवों म्ह बसै सै अर ज्यादातर गामां अर बलके शहरां म्ह भी हरियाणवी भाषा बोल्ली जावै सै|

हरियाणा की सीमा उतर म्ह पंजाब व हिमाचल प्रदेश, पशिचम अर दक्षिण म्ह राजस्थान तै, अर पूरब कान उतराखण्ड तै, उतर प्रदेश अर जमना नदी तै बंधी सै| भारत की राजधानी की सीमा इसकै तीन ओड़ तै लाग्गै सै| नतीजन, दक्षिण हरियाणा के एक बड्डे क्षेत्र की बढोत्तरी कै खातर योजना बणा कै प्रयोजनाओं कै खातर राष्ट्रीय राजधानी क्षेत्र म्ह शामिल करया गया सै| प्रति ब्यक्ति आय कै हिसाब तै हरियाणा साब्तै भारत म्ह सिर्फ गोवा अर दिल्ली तै पाच्छै सै| हरियाणा की प्रति व्यक्ति औसत आय 29,867 रपिये/सालानां (साल 2006 कै मुताबिक) सै|

राज्य सिन्धु घाटी अर वैदिक सभ्यताओं के ख़ास स्थान उरै सै| कई निर्णायक लड़ाई भी उरै लड़ी गयी सै, जिसम्ह भारत का घण-खरा इतिहास समाहित सै| इसम्ह महाभारत का महाकाव्य युद्ध भी शामिल सै| हिन्दू मता के मुताबिक महाभारत का युद्ध कुरुक्षेत्र म्ह लड़या गया(इसम्ह हिन्दुवां के भगवान कृष्ण नै भागवत गीता का उपदेश दिया)| इसकै अलावा पानीपत की लड़ाईयाँ भी उरै लड़ी गई| हाल के बख्त म्ह खाण के उत्पादन अर दूध के उत्पादन म्ह हरियाणा सारया म्ह चोट्टी पै सै| इस राज्य के बासिंदया का ख़ास कामकाज कृषि या खेती-बाड़ी करणा सै| आमतौर पै आड़ै खेती-बाड़ी कुआं तै, सम्रसीबल पम्प या नहर के पाणी तै करी जावै सै| 1960 की हरित क्रांति म्ह हरियाणा का ख़ास योगदान रह्या सै जिसतै देश खाण-पाण कै मामले म्ह बधया|

भारत म्ह ग्रामीण करोड़पतियाँ की गिणती सारया तै घणी सै| हरियाणा भी 1970 के दशक कै बाद बढोत्तरी करण लागरया सै| 2000 के बाद, हरियाणा भारत म्ह प्रति व्यक्ति निवेश का सारया तै बड्डा प्राप्त करणीये कै रूप म्ह उभरया सै| हरियाणा का गुडगाँव शहर सूचना, प्रौद्योगिकी अर ऑटोमोबाइल उद्योग कै खातर एक प्रमुख केन्द्र कै रूप म्ह उभरया सै| गुडगाँव मारुति सुजुकी देश की सारया तै बड्डी वाहन निर्माता कम्पनी सै, अर हीरो मोतोकार्प, दुपहिया वाहनों की सारया तै बड्डी कम्पनी सै| फरीदाबाद, पंचकुला, धारूहेड़ा, बावळ, सोनीपत, पानीपत, बहादुरगढ, यमुनानगर अर रिवाड़ी पानीपत रिफाइनरी दक्षिण एशिया म्ह दूसरी सारया तै बड्डी रिफाइनरी होण कै गेल-गेल, औधोगिक केन्द्र सै| हरियाणा राज्य म्ह लाम्बे बख्त तै लागे होड़ स्टील, प्लाईवुड, कागज अर कपड़ा उद्योग सै|

हरियाणा राजनैतिक तौर पर घणा आग्गै सै| इसके 21 जिले सै| इसका सारया तै बड्डा जिला फरीदाबाद सै| इसका राज्य का प्रमुख पक्षी-काला तीतर, पशु-नीलगाय, फूल-कमल, पेड़-पीपळ सै| हरियाणा के राज्यपाल कप्तान सिंह सोलंकी सै| इसके मुख्यमंत्री का नाम मनोहर लाल खट्टर सै| विधानसभा की 90 सीट सै, अर संसदीय निर्वाचन क्षेत्र म्ह लोकसभा की 10 अर राज्य सभा की 5 सीट सै|